ముల్కనూరు ప్రజా గ్రంథాలయం ప్రధాన సలహాదారు శ్రీ వేముల శ్రీనివాసులు తన మిత్రులతో తెలుగు సాహిత్యం, ముఖ్యంగా కథా సాహిత్యం గురించి చర్చించినప్పుడు తెలుగు కథను, కథా రచయితలను ప్రోత్సహించాలని అలాగే కొత్త రచయితలను గుర్తించాలని అనుకున్నారు. అందుకోసమై నమస్తే తెలంగాణ దినపత్రిక సంపాదకులు శ్రీ కట్టా శేఖర్ రెడ్డి గారిని సంప్రదించగా ఆయన తాము కూడా ఇలాంటి ఆలోచనే చేస్తున్నట్టు చెప్పారు. తెలుగు కథకు కొత్త వెలుగులు తీసుకురావాలని నిశ్చితాభిప్రాయానికి వచ్చి ముల్కనూరు సాహితీ పీఠం వారు, నమస్తే తెలంగాణ వారు సంయుక్తంగా కథల పోటీలను నిర్వహించి గణనీయమైన బహుమతులను ఇవ్వాలని, తద్వారా తెలుగు కథా రచయితలను ప్రోత్సహించాలని నిర్ణయించారు. అలా 2019 లో   మొదలైన కథల పోటీలు  ప్రతి సంవత్సరం జరుగుతున్నాయి. ఈ పోటీలలో బహుమతులు సాధించిన కథలు  నమస్తే తెలంగాణ  ఆదివారం అనుబంధం ‘బతుకమ్మ’లో ప్రచురితం అవుతున్నాయి. దీంతోపాటు  బహుమతి పొందిన కథలతో  ప్రతి సంవత్సరం ముల్కనూరు సాహితీ పీఠం ఆధ్వర్యంలో  కథా సంకలనం కూడా వెలువడుతోంది. 
ప్రజా గ్రంథాలయం – సాహితీ పీఠం ఆధ్వర్యంలో రూ.50,000 ల ప్రథమ బహుమతి, రూ.25,000 -ల ద్వితీయ బహుమతులు రెండు,  రూ.10,000/- –ల తృతీయ బహుమతులు కనీసం మూడు, కనీసం ఆరు కథలకు రూ .5000/–-ల చొప్పున విశిష్ట బహుమతులను ఇవ్వడం జరుగుతున్నది. ఇవేకాక గణనీయమైన సంఖ్యలో కథలను ఎంపిక చేసి రూ. 3000, 2000 ల బహుమతులను కూడా ప్రదానం చేస్తున్నారు. కంప్యూటర్​, కృత్రిమ మేధా ప్రపంచంలో కూడా నిలబడే సాహితీ ప్రక్రియల్లో కథ ముందు వరుసలో ఉండి, సమజాన్ని ఉన్నతీకరిస్తుందనే నమ్మకంతోనే సాహితీ పీఠం ఈ కార్యక్రమాన్ని పవిత్రంగా నిర్వహిస్తోంది.